Për të pestën ditë me radhë, në Gjykatën Themelore në Prishtinë dhe atë të Apelit, po vazhdon greva e punëtorëve të administratës, pasi këshilli grevist nuk ka arritur asnjë marrëveshje për ndërprerjen e grevës.

Këtë e ka konfirmuar për “Betimi për Drejtësi“, Naim Rrustemi, kryetar i Sindikatës së kësaj gjykate.

Nga këshilli grevist deklaruan se pas takimit të mbajtur me Albulena Haxhiun, ministre e Drejtësisë, Albert Zogajn, kryesues i Këshillit Gjyqësor të Kosovës (KGJK), Enver Pecin, kryetar i Gjykatës Supreme, Afrim Shalën, u.d i kryetarit të Gjykatës së Apelit, Albina Shabani-Ramën, kryetare e Gjykatës Themelore në Prishtinë dhe Jetish Malokun, kryesues i Këshillit Prokurorial të Kosovës (KPK), nuk kanë arritur marrëveshje për ndërprerjen e grevës, kështu që greva vazhdon edhe sot.

Ndryshe, më 1 mars fillimisht ka nisur grevën stafi administrativ i Gjykatës Themelore në Prishtinë, ku në konferencën për medie të mbajtur po atë ditë nga Naim Rrustemi, kryetar i Shoqatës Sindikale të gjykatës në fjalë, u tha se greva nuk ka të bëjë me çështje politike, se po ndodhë pa vullnetin e tyre dhe se do të vazhdojë deri në plotësimin e kërkesave të tyre.

“Kërkesat tona janë: Aprovimi i Ligjit për punëtorët e Administratave të Gjykatave dhe Prokurorive duke u bazuar në Projektligjin për Plotësim dhe Ndryshim të Ligjit për Zyrtar Publik; Përafrimi i pagave të punëtorëve të administratës së gjykatave dhe prokurorive në raport me pagat e gjyqtarëve dhe prokurorëve; Pagesa lineare nga 150 euro për çdo punëtor të administratës së gjykatave dhe prokurorive deri në hyrjen në fuqi të Ligjit për Paga; Pagesa e shujtës ditore prej 3 euro dhe pagesa e udhëtimit prej 3 euro”, ka thënë Rrustemi.